“ကျည်ကာတပ်ဆင် ဒေါင်းဝေဟင်” ကမ်ပိန်းမှ ကျည်ကာများ တော်လှန်ရေးရဲဘော်များထံသို့ စတင်ရောက်ရှိ

Share to Facebook
Share to Telegram

ဒီပိုစ့်မှာ တွဲတင်ထားတဲ့ ပုံလေးတွေကို မြင်လိုက်ရတဲ့အခါ… မိဘပြည်သူတိုင်း ကိုယ့်ရဲ့ချစ်လှစွာသော သားသမီးတွေကို အင်္ကျီအသစ်လေးတွေ ဝယ်ဆင်ပေးလိုက်ရသလိုမျိုး ရင်ထဲမှာ ကြည်နူးပီတိဖြစ်ပြီး ထပ်တူပျော်ရွှင်သွားကြမယ်လို့ ယုံကြည်ပါတယ်။

ဒါပေမဲ့ ရဲဘော်တွေဝတ်ဆင်ထားတဲ့ ဒီအင်္ကျီလေးတွေက သာမန်အင်္ကျီလေးတွေတော့ မဟုတ်ပါဘူး။ ရှေ့တန်းစစ်မြေပြင်က ရဲဘော်တွေရဲ့ တန်ဖိုးမဖြတ်နိုင်တဲ့ အသက်တွေကို ရန်သူ့ဘေးကနေ လုံလုံခြုံခြုံ အကာအကွယ်ပေးနိုင်မယ့် “အသက်ကယ် ကျည်ကာအင်္ကျီလေးတွေ” ပဲ ဖြစ်ပါတယ်။

လွန်ခဲ့တဲ့ကာလတွေက Spring CrowdFund (SCF) ပလက်ဖောင်းပေါ်မှာ အောင်မြင်စွာ ပြုလုပ်နိုင်ခဲ့တဲ့ “ကျည်ကာတပ်ဆင် ဒေါင်းဝေဟင်” ကမ်ပိန်းကို အားလုံးပဲ မှတ်မိကြဦးမယ် ထင်ပါတယ်။ အခုဆိုရင် အဲဒီကမ်ပိန်းကနေတစ်ဆင့် ပြည်သူတွေ တစ်ခဲနက် ထောက်ပို့ပေးခဲ့ကြတဲ့ ရန်ပုံငွေတွေနဲ့ ဝယ်ယူထားတဲ့ ကျည်ကာအင်္ကျီတွေဟာ ရှေ့တန်းက Peacock Drone Team ရဲဘော်တွေဆီကို ပထမအသုတ်အနေနဲ့ စတင်ရောက်ရှိနေပြီပဲ ဖြစ်ပါတယ်။

ရှေ့ဆက်ရန် ကျန်ရှိနေသေးသည့် ပီတိများ

ဒါဟာ ပထမအသုတ်အနေနဲ့ ရောက်ရှိလာတာဖြစ်ပြီး၊ နောက်ထပ် ကျန်ရှိနေသေးတဲ့ ကျည်ကာတွေ အားလုံး မြေပြင်ကို ရောက်ရှိလာတဲ့အခါမှာလည်း အလှူရှင် မိဘပြည်သူတွေ ထပ်မံ ဝမ်းသာပီတိဖြစ်ရအောင် ရဲဘော်တွေကိုယ်တိုင် အသိပေးစကား ပြောကြားပေးသွားပါဦးမယ်လို့ သတင်းစကား ပါးထားပါတယ်။

စုပေါင်းအင်အား၏ အသီးအပွင့်

ဒီလို မြေပြင်က ရဲဘော်တွေအတွက် လက်တွေ့ကျတဲ့ အသက်အကာအကွယ်တွေ ထောက်ပံ့ပေးနိုင်ခဲ့တာဟာ ကမ်ပိန်းမှာ တက်တက်ကြွကြွ ပါဝင်ပေးခဲ့ကြတဲ့ အလှူရှင် အကြည်ဓာတ်လေးတွေရဲ့ ကြီးမားလှတဲ့ စုပေါင်းအင်အား၊ အသီးအပွင့် ရလဒ်တွေပဲ ဖြစ်ပါတယ်။

ဒါကြောင့် ဒီကမ်ပိန်းလေး အောင်မြင်တဲ့အထိ တက်ညီလက်ညီ ပါဝင်ထောက်ပို့ပေးခဲ့ကြတဲ့ ပြည်သူတစ်ဦးချင်းစီတိုင်းကို SCF မှ အထူးပင် ကျေးဇူးတင် လေးစားဂုဏ်ပြုအပ်ပါတယ်။

အဆုံးသတ်အောင်ပွဲ ရရှိတဲ့အထိ ကျွန်တော်တို့အားလုံး အတူတကွ ဆက်လက်ချီတက်ကြပါစို့။ ✊

#SpringCrowdFund #SCF #တို့အတူချီတက်SCF
#ကျည်ကာတပ်ဆင်ဒေါင်းဝေဟင် #PeacockDroneTeam

SCF